ஆரோக்கியமான வாழ்விற்கு தினமும் கடைபிடிக்க வேண்டியவை....!!

நல்ல ஆரோக்கியத்துடன் இருப்பதற்காக நாம் எத்தனை முயற்சிகள் எடுத்தாலும், உடற்பயிற்சிக்கு நிகர் உடற்பயிற்சிதான். ஒருவரின் உடலுக்கேற்ற உடற்பயிற்சியை செய்வதே உரிய பலன் தரும்.

நவீன காலத்தில் அனைவரும் பெரும்பாலும் நீண்ட நேரம் அமர்ந்தே வேலை பார்ப்பதால், உடல் உழைப்பு பெருமளவு குறைந்துவிட்டது. இதனால், உடல் பருமன், சர்க்கரை நோய், இதய நோய்கள் வருவதற்கான வாய்ப்பு அதிகரித்துவிட்டது. இதை தவிர்க்க தினமும் நடைப்பயிற்சி செய்து வந்தால் நல்லது.

சிறியவர்கள் முதல் பெரியவர்கள் வரை அனைவருக்கும் உடற்பயிற்சி அவசியம். ஆரோக்கியமான வாழ்விற்கு உதவும் உடற்பயிற்சி விதிமுறைகளை பற்றிப் பார்ப்போம்....

1. தினமும் காலை 45 நிமிடங்கள் நடைப்பயிற்சி செய்ய வேண்டும். இயற்கையான காற்றை சுவாசித்தப்படி செல்லும்போது, மூச்சு விடுவதில் சிரமம் இருக்காது. எடையும் சீராக இருக்கும். நோய்களும் அண்டாது. உடலுக்குத் தேவையான வைட்டமின் டி கிடைக்கும். 

2. நடைப்பயிற்சிக்குப் பின், தசைகளை வலுவாக்கும் பயிற்சிகளை செய்ய வேண்டும். எடுத்ததும் கடினமான பயிற்சிகளைச் செய்யக்கூடாது. 

3. அவரவர் உடல் நலம், வயது, பாலினம், சர்க்கரை நோய், இரத்த அழுத்தம் போன்ற பிரச்சனைகளைக் கருத்தில்கொண்டு மருத்துவர் மற்றும் உடற்பயிற்சி ஆலோசகரிடம் உடற்பயிற்சி தொடர்பான ஆலோசனைகளை கேட்டு செய்ய வேண்டும்.

4. குழந்தைகள் தசையை உறுதிப்படுத்தும் எடை பயிற்சிகளைச் செய்யக்கூடாது. பெரியவர்கள், குழந்தைகள் என அவரவர்களின் வயதிற்கேற்ப பயிற்சிகளை மட்டுமே மேற்கொள்ள வேண்டும்.

5. குழந்தைகளைப் பொறுத்தவரை பிரதானமான உடற்பயிற்சி என்பது விளையாட்டுதான். குழந்தைகள் ஓடியாடி விளையாட வேண்டும்.

6. குழந்தைகளை நீச்சல், ஸ்கேட்டிங், டென்னிஸ், பேட்மிண்டன் போன்ற தனி விளையாட்டுகளிலும், கால்பந்து, கூடைப்பந்து போன்ற அணி விளையாட்டுகளிலும் ஈடுபடுத்த வேண்டும். அவர்களுக்கு எந்த விளையாட்டில் ஆர்வம் உள்ளது என்பதைக் கண்டறிந்து, அதில் அவர்கள் பிரத்யேகக் கவனம் செலுத்த ஊக்குவிக்க வேண்டும். 

7. முதியவர்கள் அன்றாடம் 45 நிமிடங்கள் நடைப்பயிற்சி செய்வது நல்லது. ஒரே நேரத்தில் தொடர்ந்து செய்ய முடியவில்லை என்றால், பத்து பத்து நிமிடங்களாகப் பிரித்துச் செய்யலாம்.

8. நடைப்பயிற்சி செய்யும்போது, மிதமான வேகத்தில் ஆரம்பித்து, கொஞ்சம் கொஞ்சமாக வேகத்தை அதிகரிக்க வேண்டும். அதாவது, முதல் 5-10 நிமிடங்களுக்கு மிதமான வேகம். கொஞ்சம் கொஞ்சமாக வேகத்தை அதிகரித்து அடுத்த 20 நிமிடங்களுக்கு அதிவேகம். பின்னர் 5-10 நிமிடங்களுக்கு வேகத்தைப் படிப்படியாகக் குறைத்து இயல்புநிலைக்குத் திரும்ப வேண்டும்.

9. தசை இழுப்புப் பயிற்சிகளான பாதம் தொடுதல், கைகளை உயர்த்துதல், மணிக்கட்டைச் சுழற்றுதல், குதிகாலை சுழற்றுதல், முட்டியை மடக்குதல், கழுத்து அசைவுகள் போன்றவற்றை தினமும் 5 முறை செய்யலாம்.

10. பெரியவர்கள் பேட்மிண்டன், டென்னிஸ், கிரிக்கெட் என ஏதாவது ஒரு விளையாட்டில் நேரம் கிடைக்கும்போது ஈடுபடலாம்.