ekadesi ஏகாதசி விரதம் அன்று சொல்ல ஓர் ஏற்றமிகு பாடல்

ஓம் நமோ நாராயணாய ஓம் நமோ நாராயணாய
ஓம் நமோ நாராயணாய ஓம் நமோ ஓம் நமோ

1. ஆதியாய் அனாதியாகி ஆதிமூலப் பொருளுமாகி

ஆலிலையில் பள்ளி கொண்ட ஆதி மூலமே                                   (ஓம்)

2. பக்தர்களைக் காக்க வேண்டி பத்துவித வேடங்கொண்டு

பல பலவாம் லீலை செய்த புண்ணிய மூர்த்தியே                            (ஓம்)

3. மத்ஸயமாகி நீரில் மூழ்கி மறைகள் நான்கும் தூக்கி வந்து

மாபெரும் பணியைச் செய்த மாயா மூர்த்தியே                                (ஓம்)

4. மூழ்கி மறைந்த மந்திர கிரியை மத்தாக்கி கடல் கடையமுங்கி

முதுகில் சுமந்து நின்ற மனோமோகனா                                         (ஓம்)

5. பன்றியாகி ரூபம் கொண்டு பாதாளத்தில் புகுந்து சென்று

பூமிதனை தூக்கி வந்த புண்ணிய ரூபனே                          (ஓம்)

6. சின்னஞ்சிறு பக்தன் வாக்கை சத்தியமாக்கிக் காட்ட வேண்டி

சபையில் தூணில் சாடிவந்த சத்திய மூர்த்தியே                              (ஓம்)

7. அகிலாண்ட மத்தனையும் அடியிரண்டால் அளந்த பின்பு

அசுரன் தலையில் அடியை வைத்த ஆதி தெய்வமே                        (ஓம்)

8. பரசுதனைக் கையில் கொண்டு பரமன் ராமன் எதிரில் வந்து

பத்மனாபன் தனுஸைத் தந்த பார்க்கவ ராமா                                 (ஓம்)

9. மமதை கொண்ட ராவணனை மூலமுடன் அழிக்க வேண்டி

மானிடனாய் அவதரித்த மாயா மூர்த்தியே                                     (ஓம்)

10. அண்ணனாகி சேவை செய்ய ஆர்வமுடன் கலப்பை ஏந்தி

அரும்பணிகள் பலவும் செய்த ஆதிஜோதியே                                 (ஓம்)

11. கர்வம் கொண்ட கம்ஸன் தனை கூண்டுடனே அழிக்க வேண்டி

கிருஷ்ணாவதாரம் செய்த கருணாமூர்த்தியே                                 (ஓம்)

12. கலியுகத்தில் கஷ்டம் போக்க குதிரை மீதிலேறிக் கொண்டு

கல்கியாக வரப்போகும் சாகுந்த ராமா                                           (ஓம்)

13. கலியுகத்தில் மக்களுக்கு கைவல்யம் கையில் தர

குருவாயூரில் கோயில் கொண்ட கிருஷ்ண மூர்த்தியே                     (ஓம்)

14. ஆணவத்தால் அறிவிழந்து அகந்தை கொண்ட எந்தனுக்கு

அறிவையூட்டி ஆதரிக்கும் ஆதிமூலமே                                          (ஓம்)

15. பண்ணும் பாட்டும் அறியாத பித்தன் எனைப் பாடவைத்து

பக்தனாக்கப் பாடுபடும் புண்ய ரூபனே                                             (ஓம்)

16. நாமம் நம்பி சொல்பவர்க்கு நற்கதியைத் தருவேன் என்று

நின்றலறி சத்தியம் செய்த நிகமவேத்யனே                                    (ஓம்)

17. நாமம் சொல்லும் இடந்தன்னிலே நித்ய வாசம் செய்வேனென்று

நாரதர்க்கு உறுதி தந்த நித்ய வஸ்துவே                                         (ஓம்)

18. பூர்ணாவதாரம் கொண்டு பதினாறு கலைகள் கொண்டு

பவனபுரம் வந்தடைந்த பூரண ரூபனே                                           (ஓம்)

‘காயத்ரிக்கு நிகரான மந்திரம் இல்லை. ஏகாதசிக்கு ஈடான விரதமில்லை’ என்பார்கள். விரதங்களிலேயே சிறந்ததாக கருதப்படுவது ஏகாதசி விரதம். ஒவ்வொரு மாதமும் அமாவாசை, பவுர்ணமி நாட்களில் இருந்து 11ம் நாள் ஏகாதசி. மாதத்துக்கு இரண்டு என ஒரு ஆண்டில் 24 அல்லது 25 ஏகாதசிகள் வரும். ஏகாதசியில் விரதம் இருப்பது ஒவ்வொரு மாதத்தில் ஒவ்வொரு பலன்களை தரும் என கூறப்படுகிறது.

சித்திரை மாத ஏகாதசியில் விரதம் இருந்தால் விரும்பிய பேறுகள் எல்லாம் உண்டாகும். வைகாசி & கயிலாய யாத்திரை மேற்கொண்டு பத்ரிநாத்தை தரிசித்த பலன் கிடைக்கும். ஆனி & சொர்க்கம் செல்லும் பாக்யம். ஆடி & ஆயிரக்கணக்கான ஏழைகளுக்கு அன்னதானம் செய்த புண்ணியம் உண்டாகும். ஆவணி & மக்கள்செல்வம் உண்டாகும். குழந்தைகளின் நோய், நொடிகள் நீங்கி ஆரோக்கியமான வாழ்வு உண்டாகும்.

புரட்டாசி & நிம்மதியான வாழ்வு கிடைக்கும். ஐப்பசி & சகல வளங்களும் உண்டாகும். கார்த்திகை & மகிழ்ச்சியான வாழ்வு மலரும். தை & பித்ரு சாபங்கள் நீங்கி, முன்னோர் அருளாசி கிடைக்கும். மாசி & சகல பாவங்கள், தோஷங்கள் நீங்கும். பங்குனி & தடை, தடங்கல்கள் நீங்கி வெற்றிகள் குவியும்.எல்லா ஏகாதசிகளிலும் விரதம் இருப்பவர்கள் உண்டு. ஏகாதசியன்று விரதம் இருந்து மறுநாள் துவாதசியன்று காலையில் பூஜை முடித்து சாப்பிடுவார்கள்.

ஏகாதசிகளில் சிறந்ததாக கூறப்படுவது மார்கழி மாதத்தில் வரும் ஏகாதசி. மனிதர்களுக்கு இரவு, பகல் மாறிமாறி வருவதுபோல தேவர்களுக்கும் உண்டு. ஆடி முதல் மார்கழி வரையிலான 6 மாதங்கள் அவர்களுக்கு இரவு நேரமான தட்சிணாயனம். தை மாதம் தொடங்கி ஆனி வரையிலான 6 மாதங்கள் பகல் நேரமான உத்தராயனம். பகல் தொடங்குவதற்கு முந்தைய விடியற்காலை நேரம் நமக்கு பிரம்மமுகூர்த்தம் எனப்படுகிறது.

இந்த நேரத்தில் எழுந்திருப்பது, நல்ல காரியங்கள் செய்வது மிகுந்த பலன் உடையதாக கூறப்படுகிறது. தேவர்களைப் பொருத்தவரை, மார்கழி மாதம்தான் பகல் தொடங்குவதற்கு முன்பு வரும் பிரம்மமுகூர்த்தம். அதனால், மாதங்களில் மார்கழி சிறப்பாக கூறப்படுகிறது. அதில் வரும் ஏகாதசி திதி சிறப்பு பெறுகிறது. இதுவே வைகுண்ட ஏகாதசி. பாற்கடலில் துயில் கொண்டிருக்கும் மகாவிஷ்ணு விழித்தெழும் காலத்தில் அவனை தொழுவது சகல நலன்களையும் சேர்க்கும் என்பது ஐதீகம்.

முரன் என்ற அரக்கனை அழிப்பதற்காக தனது உடலில் இருந்து மோகினியை மகாவிஷ்ணு தோற்றுவித்தார். முரனை மோகினி சம்ஹரித்த நாளே ஏகாதசி. அன்றைய தினம் தன்னை வழிபடுபவர்களுக்கு வைகுண்ட பதவி அளிப்பதாகவும் பெருமாள் அருளினார். எல்லா ஏகாதசிகளும் விரதம் இருக்க முடியாதவர்கள் வைகுண்ட ஏகாதசியில் இருக்கலாம். ஏகாதசிக்கு முந்தைய நாளான தசமியிலேயே விரதம் தொடங்க வேண்டும். அன்றை தினம் ஒருவேளை மட்டும் சாப்பிடுவார்கள்.

ஏகாதசி தினம் முழுவதும் எதுவும் சாப்பிடாமல் இருப்பது சிறப்பு. முடியாதவர்கள் சுவாமிக்கு படைத்த பழம், பால் உண்ணலாம். விஷ்ணு சகஸ்ரநாமம், விஷ்ணு பாடல்கள் பாடலாம். அதிகாலையில் பரமபத வாசல் எனப்படும் சொர்க்க வாசலுக்கு பெருமாள் எழுந்தருள்வார். அவரோடு சேர்ந்து நாமும் பரமபத வாசலை மிதிப்பது மிகவும் விசேஷம். அன்றைய தினம் இரவு கண் விழிக்க வேண்டும்.

மறுநாள் துவாதசியன்று அகத்திக்கீரை, நெல்லிக்காய், சுண்டைக்காய் உள்பட 21 கறியுடன் நிவேதனம் படைத்து ஏழைகள், அடியார்களுக்கு வழங்கி பின்னர் நாம் சாப்பிடுவது சிறப்பானதாகும். வைகுண்ட ஏகாதசியில் விரதம் இருப்பது 3 கோடி ஏகாதசிகள் விரதம் இருப்பதற்கான பலனை கொடுக்கும் என்பது நம்பிக்கை.          -மகாஸ்வாமிகள்