கொழுப்பைக் குறைக்கும் பயறு

ஊட்டம் தரும் வேகாத உணவுகள்!

‘துரித உணவு' (பாஸ்ட் புட்) நிலைபெற்றுவிட்ட இக்காலத்தில், வேகாத உணவைப் பற்றிப் பலரும் சிந்திப்பது உடலுக்குத் தரும் நன்மைகளைக் கருதித்தான்.

உணவுப் பொருட்களை வேக வைத்து உண்பதால், அதிலுள்ள ஊட்டச்சத்துகள் அழிந்துவிடும் என்று தெரிந்திருந்தாலும், உண்ட உணவு நன்றாகச் செரிப்பதற்காகச் சமைத்து உண்பது வழக்கமாகிவிட்டது. எனினும், கீழ்க்காணும் உணவு வகைகளை வேக வைக்காமல் தயாரித்து உண்பதால் ஊட்டச்சத்துகளை முழுமையாகப் பெறலாம்.

வாழைத்தண்டு கூட்டு

பொடியாக நறுக்கிய வாழைத்தண்டோடு, ஒரு கப் தயிர் சேர்த்து, தேங்காய் துருவல், நிலக்கடலை, பச்சைமிளகாய் ஆகியவற்றைச் சேர்த்து அரைத்து, பச்சையாகவே சாப்பிடலாம். நார்ச்சத்து மிகுந்த வாழைத்தண்டை வெறும் வயிற்றில் சாப்பிட்டால் எடை குறையும். பொட்டா சியம் இருப்பதால் வயிற்று வலியையும் குறைக் கும். அசிடிட்டி, அல்சருக்கும் இது மருந்து.

கேரட் - பயறு கூட்டு

முழு பச்சைப் பயறை நீரில் முந்தைய நாள் இரவு ஊறவைத்து , முளைகட்டியதும் அதனுடன் கேரட் துருவலைச் சேர்த்து, சிறிது உப்பு, ஒரு டீஸ்பூன் எலுமிச்சைச் சாறு சேர்த்து உண்ணலாம். புரதச்சத்து மிகுந்தது என்பதால் உடலுக்கு நல்ல ஆற்றலைத் தரும், முதுமையடைவதைக் குறைக்கும். கொழுப்புச்சத்து குறைவு என்பதால் இதயத்துக்கு நல்லது. நார்ச்சத்து இருப்பதால், செரிமானமும் எளிதாகும். கண்களுக்கு மட்டுமில்லாமல், தோலுக்கும் இது நல்லது.

புடலங்காய் கூட்டு

இளசான புடலங்காயைப் பொடியாக நறுக்கி, அதனுடன் நிலக்கடலை, தேங்காய் துருவல், பச்சை மிளகாய் சிறிதளவு கலந்து உண்ண, மிகவும் ருசியாக இருக்கும். உடலுக்குக் குளிர்ச்சி தரும் இது காய்ச்சலைக் குறைக்கும். இதயத்துக்கும் நல்லது. மஞ்சள் காமாலையைக் குறைக்கவும் உதவும்.

பூசணி ஜூஸ்

சாம்பல் பூசணிக்காயைத் துருவி , மிக்ஸியில் நன்றாக அரைத்து வடிகட்டிக்கொள்ளவும். அந்தச் சாற்றுடன் சிறிது மிளகுத் தூள், சிறிது உப்பு சேர்த்து அருந்தலாம். குளிரூட்டும் தன்மையுள்ள இச்சாற்றினால் சளி பிடிக்கக் கூடும். அதைத் தவிர்க்க, சிறிது தேன் கலந்து அருந்தவேண்டும். இது உடலை இளைக்க வைக்கும் தன்மைகொண்டது.

- கிரிஜா நந்தகோபால், திருச்சி.

கொழுப்பைக் குறைக்கும் பயறு

உடலுக்குச் சக்தியும் வலுவும் தரும் உணவுப் பொருட்களில் தானியங்களுக்குத் தனியிடம் உண்டு. ஒவ்வொரு தானியத்துக்குக்கும் ஒரு சிறப்பு இருக்கிறது. அவற்றைத் தெரிந்துகொண்டு சாப்பிட்டு உடலை வலுப்படுத்தலாம்.

சோளம்: உடலுக்கு உறுதியை அளிக்கும். உடல் பருமனைக் குறைக்கும். வயிற்றுப்புண், வாய் துர்நாற்றத்தைப் போக்கும்.

கோதுமை: நீரிழிவு நோயாளிகளுக்குச் சிறந்த உணவு. மலச்சிக்கல் உண்டாகாது. உடலில் உள்ள தேவையற்ற நீரை வெளியேற்றி எடையைக் குறைக்கும். உடல் வறட்சியைப் போக்கும். குடல் புண்ணை ஆற்றும்.

வரகு: உடல் எடையை குறைக்கும். மாதவிடாய் கோளாறுகளைத் தடுக்கும்.

கொண்டைக்கடலை: பக்கவாதநோய் தாக்குதலில் இருந்து பாதுகாக்கிறது.

சோயாபீன்ஸ் : அனைத்து வைட்டமின் பி வகைகளும் உள்ளன. இவை இதயம், கல்லீரல் செயல்பாடுகளில் முக்கியப் பங்கு வகிக்கின்றன. அதிக புரோட்டின், நார்ச்சத்து உள்ளதால் சோர்வடைந்த இதயத்திற்கு சோயாவின் பாதுகாப்பு அபரிமிதமானது. இயற்கையான ஆண்டி ஆகிசிடென்ட் நிறைந்தது. அதிக மினரல்கள் உள்ளன. உறுதியான எலும்புகள் உருவாகும். மெனோபாஸ் பிரச்சினைகளைத் தடுக்கும். உடம்பில் கொழுப்பின் அளவைக் குறைத்து இரத்த குழாய்களுக்குள் அடைப்பு ஏற்படாமல் தடுக்கும்.

பச்சைபயறு: முளைகட்டிய பயிறு உடல் எடையை குறைக்கும். நோயாளிகளுக்கும் உகந்தது.

உளுந்து: ஆண்மையைப் பெருக்கும். பெண்களுக்கு இடுப்புக்கு வலிமை கொடுக்கும். மாதவிலக்கைச் சீராக்கும்

தட்டைப்பயறு: உடலில் புதிய செல்களை உருவாக்கத் தேவையான அமினோ அமிலங்களை உற்பத்தி செய்ய உதவுகிறது. உடலில் அதிகக் கொழுப்பு சேர்வது தடுக்கப்பட்டு உடல் குண்டாகாமால் இருக்க உதவுகிறது.

கொள்ளு: கொழுப்பைக் கரைப்பதில் முதலிடம், உடலில் இருக்கும் தேவையற்ற தண்ணீரை எடுத்துவிடும். இரத்தத்தைச் சுத்திகரிப்பதுடன் உடலில் உள்ள நச்சுத்தன்மையை நீக்கிவிடும். வளரும் குழந்தைகள், உடற்பயிற்சி செய்வோருக்கு மிகவும் உகந்தது.

மூலநோய்க்கும், ரூமாட்டிசம் பிரச்சினைகளுக்கும், காய்ச்சலைக் கட்டுபடுத்த, இருமல் மற்றும் சளியை விரட்ட என கொள்ளு குணமாக்கும் பட்டியல் நீள்கிறது. வயிற்றுப்புண்ணுக்கும், சிறுநீரகக் கற்களை வெளியேற்றவும் அதிக ரத்தப்போக்கைக் கட்டுப்படுத்தவும் பயன்படுகிறது. சிக்குன்குனியா நோய் பாதித்தவர்களுக்குக் கொள்ளு வேக வைத்த தண்ணீரில் சூப் வைத்துக் கொடுக்கலாம்.

- சரஸ்வதி பஞ்சு, திருச்சி - 21.

ஆஸ்துமாவைத் தடுக்க-கேரட், பப்பாளி

சிறுநீரகக் கல் உருவாகாமல் இருக்க-வாழைத்தண்டு, மாதுளை

ரத்த அழுத்தம் சீராக இருக்க-எலுமிச்சை, திராட்சை, கேரட்

ரத்த அழுத்தக் குறைவு ஏற்படாமல் தடுக்-பச்சைமிளகாய், பூண்டு

ரத்தத்தை சுத்திகரிக்க-தக்காளி

சளித்தொல்லையில் இருந்து விடுபட-நெல்லிக்காய்

வயிற்றுப்புண் உருவாகாமல் இருக்க-கேரட், மணத்தக்காளிக் கீரை, தேங்காய்ப்பால்

ரத்தசோகையைக் குறைக்க-பேரீச்சம் பழம், கிஸ்மிஸ், கீரை, மாதுளை

பித்தக்கல்லைத் தடுக்க-பீட்ரூட், வெள்ளரிக்காய்

காய்ச்சல் உண்டாவதைத் தடுக்க-திராட்சை, மாதுளை

வாயுத்தொல்லையில் இருந்து விடுபட-தேங்காய்ப்பால், கேரட்

இதய நோய் இல்லாமல் போக-அன்னாசிப்பழம், தேன்

மஞ்சள் காமாலை வந்தால்-கீழாநெல்லி

கல்லீரல் நோய்க்கு-காரட், பீட்ரூட், அன்னாசி, வெள்ளரி.

- ஐ.எஸ்.ரமணி பூந்தமல்லி, சென்னை